السلام عليكم ورحمة الله وبركاته

بقالى كتييييييييييييييير مكتبتش حاجة جديدة لا فى البلوج ولا فى غيره نظراً للظروف الغريبة والغير مستقرة اللى مريت بيها واللى الحمد لله كان اغلبها سعيد بفضل الله

هنتكلم النهاردة عن حاجة مهمة جدا بتواجه شريحة كبيرة من مستخدمين اللينكس، وهى ان مستخدمين كتير جدا بيبقوا عايزين يعملوا حاجة معينة فى السيستم من خلال سطر الأوامر وبيبقوا مش عارفين اسم الامر اللى بينفذ الوظيفة دي

المشكلة دي بسيطة وحلها ابسط

الحل يكمن فى امر

man -k

طريقة استخدامه

man -k <keyword>

العلامتين < > بيدلَوا على ان لازم الامر ياخد قيمة بس متغيرة على حسب طلبك، راجع البوست دا وانت تفهم اكتر..

كلام حلو اوى اللى فات دا، وهيوضح اكتر بالمثال التالى:

فلنفترض اننا عايزين نمسح ملف او ملفات معينة، ومش عارفين بالظبط اسم الامر اللى بيمسح، فماذا نحن فاعلون

هنفتح سطر الاوامر وهنكتب

$ man -k delete

هتلاقيه طلعلك قايمة كبيرة جدا من اسماء الاوامر، هتلاقى على الناحية الشمال اسم الامر وقدامه وصف قصير لاستخدامه

طبعا الامر تقدر تستخدمه كمستخدم عادى مش شرط تكون مستخدم جذر او root

طب لو كنت عايز ابحث عن وظيفة امر مكونة من اكتر كلمة؟

طبعا زي ما الاغلبية عارفة ان لو كتبنا اكتر من كلمة وبين كل واحدة والتانية مسافة بغرض البحث عنها كجملة واحدة سطر الاوامر بيقرا كل واحدة كمعطى منفصل، فطبعا عشان نتلاشى حاجة زي دي هنحدد لسطر الاوامر انه يقرا الجملة على بعضها، ودا عن طريق اننا بنحط الجملة بين علامة او علامتين تنصيص single quote or double quote signs

زي كدا

$ man -k ‘determine locale support’

اهم حاجة تكون عارف الصيغة اللى هتكتب بيها الوظيفة اللى هتبحث عنها

ملحوظة صغننة

man -k

بيستخدم قاعدة بيانات whatis

واللى طبعا لو كنت راجعت البوست اللى قولت عليه فى الاول كنت عرفت ان قاعدة البيانات دى غير متاحة فى النظام بعد تثبيته ، ولكن بتتنشئ بعد يوم من تثبيت النظام وبتتحدث كل يوم بالليل.

ولو قفلت معاك خالص وعايز تعملها بعد ما تثبت النظام على طول ادخل بمستخدم الروت او الجذر واكتب الامر دا

# makewhatis

وعيش يامعلم

Peace!